قازاقستان رەسپۋبليكاسى ءبىلىم جانە عىلىم مينيسترلىگىنىڭ بۇيرىعى  №20

2016 جىلعى 12 قاڭتار, استانا قالاسى عىلىمي قىزمەتتىڭ ناتيجەلەرىن جاريالاۋ ءۇشىن ۇسىنىلاتىن باسىلىمدار تىزبەسىنە قوسۋ ءۇشىن عىلىمي باسىلىمدارعا قويىلاتىن تالاپتاردى بەكىتۋ تۋرالى «ءبىلىم تۋرالى» 2007 جىلعى 27 شىلدەدەگى قازاقستان رەسپۋبليكاسى زاڭىنىڭ 5-بابىنىڭ 36-2) تارماقشاسىنا سايكەس بۇيىرامىن: 1. قوسا بەرىلىپ وتىرعان عىلىمي قىزمەت ناتيجەلەرىن جاريالاۋعا ۇسىنىلاتىن باسىلىمداردىڭ تىزبەسىنە قوسۋ ءۇشىن عىلىمي باسىلىمدارعا قويىلاتىن تالاپتار بەكىتىلسىن. 2. قازاقستان رەسپۋبليكاسى ءبىلىم جانە عىلىم مينيسترلىگىنىڭ ءبىلىم جانە عىلىم سالاسىنداعى باقىلاۋ كوميتەتى (س.ن. ءنۇسىپوۆ) زاڭنامادا بەلگىلەنگەن تارتىپپەن: 1) وسى بۇيرىقتىڭ قازاقستان رەسپۋبليكاسى ادىلەت مينيسترلىگىندە مەملەكەتتىك تىركەلۋىن; 2) قازاقستان رەسپۋبليكاسى ادىلەت مينيسترلىگىندە مەملەكەتتىك تىركەلگەننەن كەيىن كۇنتىزبەلىك ون كۇن ىشىندە وسى بۇيرىقتىڭ كوشىرمەسىن مەرزىمدى باسپا باسىلىمدارىندا جانە «قازاقستان رەسپۋبليكاسى ادىلەت مينيسترلىگىنىڭ رەسپۋبليكالىق قۇقىقتىق اقپارات ورتالىعى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنىنىڭ «ادىلەت» اقپاراتتىق-قۇقىقتىق جۇيەسىندە رەسمي جاريالاۋعا جىبەرسىن; 3) وسى بۇيرىقتى قازاقستان رەسپۋبليكاسى ءبىلىم جانە عىلىم مينيسترلىگىنىڭ رەسمي ينتەرنەت-رەسۋرسىندا ورنالاستىرسىن. 3. وسى بۇيرىقتىڭ ورىندالۋىن باقىلاۋ قازاقستان رەسپۋبليكاسى ءبىلىم جانە عىلىم مينيسترلىگى ءبىلىم جانە عىلىم سالاسىنداعى باقىلاۋ كوميتەتىنىڭ توراعاسى س.ن. نۇسىپوۆكە جۇكتەلسىن. 4. وسى بۇيرىق العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى. مينيستر ا. ءسارىنجىپوۆ «كەلىسىلدى» قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ توراعاسى ۆ. جۇماقانوۆ __________ 2016 جىلعى 4 اقپان «كەلىسىلدى» قازاقستان رەسپۋبليكاسىنىڭ ينۆەستيتسيالار جانە دامۋ ءمينيسترى ءا. يسەكەشەۆ___________ 2016 جىلعى 5 اقپان «كەلىسىلدى» قازاقستان رەسپۋبليكاسى ىشكى ىستەر ءمينيسترى ق. قاسىموۆ _________ 2016 جىلعى 29 قاڭتار «كەلىسىلدى» قازاقستان رەسپۋبليكاسىنىڭ قورعانىس ءمينيسترى ي. تاسماعامبەتوۆ _________ 2016 جىلعى 1 اقپان قازاقستان رەسپۋبليكاسى ءبىلىم جانە عىلىم ءمينيسترىنىڭ 2016 جىلعى قاڭتارداعى №20 بۇيرىعىمەن بەكىتىلگەن عىلىمي قىزمەتتىڭ ناتيجەلەرىن جاريالاۋ ءۇشىن ۇسىنىلاتىن باسىلىمدار تىزبەسىنە قوسۋ ءۇشىن عىلىمي باسىلىمدارعا قويىلاتىن تالاپتار 1. جالپى ەرەجەلەر 1. وسى عىلىمي قىزمەت ناتيجەلەرىن جاريالاۋعا ۇسىنىلاتىن باسىلىمداردىڭ تىزبەسىنە (بۇدان ءارى - باسىلىمداردىڭ تىزبەسى) قوسۋ ءۇشىن عىلىمي باسىلىمدارعا قويىلاتىن تالاپتار (بۇدان ءارى – تالاپتار) «ءبىلىم تۋرالى» 2007 جىلعى 27 شىلدەدەگى قازاقستان رەسپۋبليكاسى زاڭىنىڭ 5-بابىنىڭ 36-2) تارماقشاسىنا سايكەس ازىرلەنگەن. 2. باسىلىمدار تىزبەسىن قازاقستان رەسپۋبليكاسى ءبىلىم جانە عىلىم مينيسترلىگىنىڭ ءبىلىم جانە عىلىم سالاسىنداعى باقىلاۋ كوميتەتى قالىپتاستىرادى. باسىلىمدار تىزبەسىنە مىناداي تالاپتارعا سايكەس كەلەتىن عىلىمي باسىلىمدار ەنگىزىلەدى: 1) «بۇقارالىق اقپارات قۇرالدارى تۋرالى» 1999 جىلعى 23 شىلدەدەگى № 451-I قازاقستان رەسپۋبليكاسىنىڭ زاڭىنىڭ (بۇدان ءارى - زاڭ) 4-3 بابىنىڭ 2) تارماقشاسىنا سايكەس قازاقستان رەسپۋبليكاسى ينۆەستيتسيالار جانە دامۋ مينيسترلىگىندە ەسەپكە قويىلۋ تۋرالى كۋالىكتىڭ, جازىلۋ يندەكسىنىڭ جانە ISSN (International Standard Serial Number) حالىقارالىق ستاندارتتى سەريالىق ءنومىرىنىڭ بولۋى; 2) عىلىمي باسىلىمنىڭ ءاربىر نومىرىندە مالىمدەلگەن سالاداعى ىرگەلى جانە قولدانبالى زەرتتەۋلەردىڭ وزەكتى پروبلەمالارى بويىنشا عىلىمي جۇمىستار جاريالانادى; 3) عىلىمي باسىلىمنىڭ مەرزىمدىلىگى جىلىنا كەمىندە ەكى رەت, عىلىمي باسىلىمنىڭ شىعۋ ۋاقىتىن – مالىمدەلگەن مەرزىمىن ساقتاۋ; 4) عىلىمي باسىلىمنىڭ حالىقارالىق اقپاراتتىق رەسۋرستاردا تارالۋى نەمەسە قازاقستاندىق دايەكسوز الۋ بازاسىندا نولدىك ەمەس يمپاكت-فاكتورلى جۋرنالدىڭ بولۋى; 5) رەداكتسيا القاسىنىڭ نەمەسە رەداكتسيالىق كەڭەستىڭ حالىقارالىق نەمەسە وتاندىق دايەكسوز الۋ جۇيەلەرىندە رەداكتسيالىق القا (رەداكتسيالىق كەڭەس) مۇشەلەرىنىڭ ەڭبەكتەرىنەن دايەكسوز الۋدى بولجايتىن عىلىمي بەدەلى جانە رەداكتسيالىق القا (رەداكتسيالىق كەڭەس) قۇرامىندا شەتەلدىك عالىمداردىڭ بولۋى; 6) عىلىمي باسىلىمنىڭ اقپاراتتىق اشىقتىعى – عىلىمي باسىلىمنىڭ قاعاز جانە ەلەكتروندى نۇسقاسى (بار بولعان جاعدايدا) تۋرالى جالپى اقپارات, ونىڭ ىشىندە عىلىمي باسىلىمنىڭ رەداكتسيالىق ساياساتى جانە تاقىرىپتىق باعىتى تۋرالى مالىمەتتەر; دارەجەسى جانە عىلىمي اتاعى (بولعان جاعدايدا), جۇمىس ورنى كورسەتىلگەن رەداكتسيالىق القانىڭ (رەداكتسيالىق كەڭەستىڭ) قۇرامى; قولجازبانى رەسىمدەۋ بويىنشا اۆتورلارعا ارنالعان نۇسقاۋلىق; ىزدەۋ جۇيەسى; سوڭعى ون ەكى ايداعى نومىرلەردىڭ مازمۇنى جانە مازمۇنىنا قول جەتكىزۋ مۇمكىندىگىمەن وتكەن جىلدارداعى نومىرلەردىڭ ءارحيۆى; بايلانىس اقپاراتى; جاريالانىمدار ەتيكاسىنا قويىلاتىن تالاپتار; ماقالالاردى رەتسەنزيالاۋ ءتارتىبى كورسەتىلگەن عىلىمي باسىلىمنىڭ دەربەس ەلەكتروندىق سايتىنىڭ بولۋى; 7) عىلىمي ەڭبەكتەردى رەداكتسيا القاسى (رەداكتسيالىق كەڭەس) قۇرامىنا كىرمەيتىن كەمىندە ەكى تاۋەلسىز عالىمنىڭ نەمەسە ءتيىستى تاقىرىپ بويىنشا ماماننىڭ رەتسەنزيالاۋى; 8) «ۇلتتىق عىلىمي-تەحنيكالىق اقپاراتتىق ورتالىعى» اكتسيونەرلىك قوعامىنان (بۇدان ءارى – ۇعتاو) مىناداي اقپاراتتار كورسەتىلگەن انىقتامانىڭ بولۋى: قورلاردى قالىپتاستىرۋ جانە ەلەكتروندى كىتاپحاناعا ەنگىزۋ ءۇشىن عىلىمي باسىلىمداردىڭ كەمىندە ءۇش جىلعى ەلەكتروندىق نۇسقالارىن ۇسىنۋ تۋرالى; ستاندارتتاۋ, مەترولوگيا جانە سەرتيفيكاتتاۋ بويىنشا مەملەكەتارالىق كەڭەس قابىلداعان (1998 جىلعى 28 مامىرداعى № 1:3-98 حاتتاما) «جۋرنالدار, جيناقتار, اقپاراتتىق باسىلىمدار. جاريالاناتىن ماتەريالداردى باسپالىق رەسىمدەۋ» گوست 7.5-98 بويىنشا ماقالالاردىڭ, سونداي-اق ستاندارتتاۋ, مەترولوگيا جانە سەرتيفيكاتتاۋ بويىنشا مەملەكەتارالىق كەڭەس قابىلداعان (2003 جىلعى 2 شىلدەدەگى № 12 حاتتاما) «بيبليوگرافيالىق جازبا. بيبليوگرافيالىق سيپات. قۇراستىرۋدىڭ جالپى تالاپتارى جانە قاعيداسى» گوست 7.1-2003 بويىنشا ماقالالارداعى بيبليوگرافيالىق تىزىمدەردىڭ رەسىمدەۋ جونىندەگى بازالىق باسپا ستاندارتتارىنا سايكەستىگى تۋرالى; قازاقستاندىق دايەكسوز الۋ بازاسىندا نولدىك ەمەس يمپاكت-فاكتورلى جۋرنالدىڭ بولۋى (بار بولعان جاعدايدا); رەداكتسيا القاسى (رەداكتسيالىق كەڭەس) مۇشەلەرىنىڭ ماقالالارىنا سىلتەمە جاسالۋى تۋرالى مالىمەت; 9) شەتەلدىك اۆتورلاردىڭ جاريالانىمدارىنىڭ, سونداي-اق جۋرنالدىڭ ءاربىر نومىرىندە شەت تىلدەرىندەگى جاريالانىمداردىڭ بولۋى; 10) جاريالانىمدار مەن اۆتورلار ەتيكاسىنا قويىلاتىن تالاپتار. 3. Web of Science, Scopus, Pubmed, zbMath, MathScinet, Agris, Georef, Astrophysical journal بيبليومەتريكالىق دەرەكتەر بازاسىنا ەنگىزىلگەن عىلىمي باسىلىمدار وسى تالاپتىڭ 6-تارماعىنداعى نورمالاردى قولدانباي باسىلىمدار تىزبەسىنە ەنگىزىلەدى. 4. قورعانىس مينيسترلىگى, ىشكى ىستەر مينيسترلىگى قازاقستان رەسپۋبليكاسىنىڭ ارناۋلى مەملەكەتتىك ورگاندارى عىلىمي باسىلىمدارىنىڭ كاسىپتىك قىزمەتىنىڭ ەرەكشەلىگىن ەسكەرە وتىرىپ, باسىلىمدار تىزبەسىنە مىناداي تالاپتارعا سايكەس كەلەتىن عىلىمي باسىلىمدار ەنگىزىلەدى: 1) زاڭنىڭ 4-3 بابىنىڭ 2) تارماقشاسىنا سايكەس قازاقستان رەسپۋبليكاسى ينۆەستيتسيالار جانە دامۋ مينيسترلىگىندە ەسەپكە قويىلۋ تۋرالى كۋالىكتىڭ بولۋى (زاڭنىڭ 12-بابىنا سايكەس تارالىمى 100 داناعا جەتپەيتىن باسىلىمداردان باسقاسى); 2) قورعانىس جانە قاۋىپسىزدىك, اسكەري, اسكەري-تەحنيكالىق, قوعامدىق جانە گۋمانيتارلىق عىلىمدار سالاسىنداعى ىرگەلى جانە قولدانبالى زەرتتەۋلەردىڭ وزەكتى پروبلەمالارى جونىندەگى عىلىمي جۇمىستاردىڭ جاريالانىمى; 3) ستاندارتتاۋ, مەترولوگيا جانە سەرتيفيكاتتاۋ بويىنشا مەملەكەتارالىق كەڭەس قابىلداعان (1998 جىلعى 28 مامىرداعى № 1:3-98 حاتتاما) «جۋرنالدار, جيناقتار, اقپاراتتىق باسىلىمدار. جاريالاناتىن ماتەريالداردى باسپالىق رەسىمدەۋ» گوست 7.5-98 بويىنشا ماقالالاردىڭ, سونداي-اق ستاندارتتاۋ, مەترولوگيا جانە سەرتيفيكاتتاۋ بويىنشا مەملەكەتارالىق كەڭەس قابىلداعان (2003 جىلعى 2 شىلدەدەگى № 12 حاتتاما) «بيبليوگرافيالىق جازبا. بيبليوگرافيالىق سيپات. قۇراستىرۋدىڭ جالپى تالاپتارى جانە قاعيداسى» گوست 7.1-2003 بويىنشا ماقالالارداعى بيبليوگرافيالىق تىزىمدەردى رەسىمدەۋ جونىندەگى بازالىق باسپا ستاندارتتارىنا سايكەستىگى تۋرالى ۇعتاو-دان بەرىلگەن انىقتامانىڭ بولۋى; 4) مەملەكەتتىك قۇپيالاردى قامتيتىن باسىلىمداردى قوسپاعاندا, اقپاراتتىق رەسۋرستار ارقىلى جۋرنالعا قول جەتكىزۋ; 5) شەتەلدىك اۆتورلار جاريالانىمدارىنىڭ بولۋىن بىلدىرەتىن جۋرنالدىڭ حالىقارالىق باعىتتىلىعى, سونداي-اق ماتەريال جاريالاناتىن عىلىم سالاسىنداعى جۋرنالدىڭ رەداكتسيا القاسىنىڭ حالىقارالىق قۇرامى (مەملەكەتتىك قۇپيالاردى قامتىمايتىن باسىلىمداردان باسقا). جۋرنال ورنالاسقان اقپاراتتىق رەسۋرستاردا دارەجەسى جانە عىلىمي اتاعى (بولعان جاعدايدا) كورسەتىلگەن رەداكتسيا القاسى مۇشەلەرىنىڭ دەرەكتەرى كەلتىرىلەدى; 6) جۋرنالدىڭ ۋاقىتىلى شىعارىلۋى جانە باسىلىم مەرزىمدىلىگى جىلىنا كەمىندە ەكى رەت, تارالىمى كەمىندە ەكى ءجۇز دانا. مەملەكەتتىك قۇپيالاردى قامتيتىن باسىلىم تارالىمىن باسپا ايقىندايدى; 7) تاقىرىپتارىنا جاقىن سالادا زەرتتەۋلەر جۇرگىزەتىن مامانداردىڭ ماقالالاردى رەتسەنزيالاۋى; 8) مەملەكەتتىك قۇپيالاردى قامتيتىن باسىلىمداردان باسقا, شەتەل تىلىندەگى ماقالالاردىڭ بولۋى. بۇيرىق قازاقستان رەسپۋبليكاسىنىڭ ادىلەت مينيسترلىگىندە 2016 جىلعى 5 ناۋرىزدا نورماتيۆتىك قۇقىقتىق كەسىمدەردى مەملەكەتتىك تىركەۋدىڭ تىزىلىمىنە №13409 بولىپ ەنگىزىلدى.